Aqmescitte yaqalanğan «Qırım birdemligi» cemaat birleşmesiniñ ve «Grani.ru» neşriniñ jurnalisti Abdulla Seydametovnı muarririyet vazifesini ve matbuat kartasını köstergen soñ polis bölüginden yiberdiler.
«Qırım birdemligi»niñ haber etkenine köre, muarririyetniñ vazifesi ile Seydametov Rusiyeniñ nezaretinde olğan Qırım garnizon arbiy mahkemesiniñ binasına Aqmescit «Hizb ut-Tahrir davası» istinaf mahkeme oturışından levha azırlmamaq içün ketken.
«Teneffüs vaqtında polis hadimleri mahkeme binasından 20 metr uzaqlıqta turğan «Qırım birdemligi»niñ koordinatorı Dilâver Memetovnı yaqalap başladı. Seydametov işdeşleri ile beraber vidio çekiş içün anda kettiler, onı ise jurnalist olğanına baqmadan faal ile beraber polis bölügine alıp kettiler», – dep haber ettiler faaller.
Fallerniñ bildirgeni kibi, Seydametov yanında matbuat kartası olmağanını ve işdeşleri onı tezden ketireceklerini quvetçilerge aytqan. Vesiqalarnen tanış olğan soñ Merkeziy polis bölüginiñ hadimleri Abdulla Seydamentovnı yibergenler.
Rusiye quvetçileri tarafından yaqalanğan «Qırım birdemligi» cemaat birleşmesiniñ koordinatorı Dilâver Memetovnı noyabrniñ 27-nde cumaertesi künü mahkemege ketirecekler.
Memetov Rusiye Federatsiyasınıñ Memuriy uquq bozuvları kodeksiniñ 20.2.2 maddesine istinaden («Cemaat nizamınıñ bozuluvına sebep olğan vatandaşlarnıñ cemaat yerlerinde aynı vaqıtta kütleviy şekilde bulunması ve (ya da) areket etmesi») qabaatlana.
Noyabrniñ 26-nda Aqmescitte Qırım garnizon mahkemesiniñ binası yanında Rusiye quvetçileri «Qırım birdemligi»niñ koordinatorı Dilâver Memetovnı ve Abdulla Seydametovnı yaqaladı.
Qanun qoruyıcılar koordinatorğa "tekrar olğan bozuv" aqqıda bildirip, polis bölügine alıp kettiler, sebep noyabrniñ 23-nde Edem Semedlâyevniñ qarşılap almasına kelmesi oldı. Onı polis kapitanı Aleksey Küznetsov yaqaladı.
Rusiye quvetçileri noyabrniñ 23-nde Aqmescitteki vaqtınca tutuv izolâtorınıñ binasına 12 kün memuriy apiste qalğan advokat Edem Semedlâyevni qarşılamağa kelgen faallerni tuttı. Umumen 31 insan tutuldı, aralarında qadın ve balalar bar edi. Bundan ğayrı, yanlarında matbuat kartları olğan jurnalistler «alındı».
Noyabrniñ 24-nde Rusiye kontrolindeki Qırım mahkemelerinde qırımtatar faallerine qarşı memuriy protokollar baqıldı. Aqmescitniñ Kiyev rayon mahkemesi vatandaş jurnalisti Vilen Temeryanovnı 14 künge apiske aldı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti buña qulaq asmay.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.