Vatandaş jurnalisti Zidan Acikelâmovnıñ aytıp bergenine köre, quvetçiler saba evinde tintüv keçirgen soñ protokol tizgenler.
Tintüvniñ sebebini sorağanda, añlayışlı bir cevap bermegenler.
«Sanki men bir şeyge azırlanam. Belki de evimde bir şeyler bar. Olar bir şey tapmadılar. İç bir şey tapmağanları aqqında protokol tizgenlerini ayttılar: «Er şey yahşı, bir şey yoq. Biz keldik, basıp kirmedik, OMONsız edik, köresiz, e. Er şeyni itinanen yaptıq», – dedi Acikelâmov tefsirinde.
Qayd etkenine köre, o, advokatsız protoklnı imzalamaqtan red etken, quvetçiler ise, «o zaman iç bir şeyni imzalamaq kerek degıl» aytqanlar.
«İç bir şey bermediler. Atta protokolnıñ kopiyasını. Çünki men imzalamağanım eken. İmzalasa edim, o zaman protokolnıñ kopiyasını berer ediler», – dedi jurnalist.
Tintüvde altı quvetçi ve eki şaat iştirak etken. Oña tintüvni çekmege ya da bir kimsege onıñ aqqında haber etmege yasaq etkenler.
Mayısnıñ 19-nda, saba «Qırım birdemligi» cemaat birleşmesiniñ mühbiri Zidan Acikelâmovğa «tahqiqat tedbirleri» ile bir qaç polis ve FSB hadimi keldi.
Rusiye qanun qoruyıcı organlarınıñ tefsirleri yoq.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
