Rostov-na-Donudaki Şimaliy-Kavkaz okrugınıñ arbiy mahkemesi vatandaş jurnalisti Nariman Memedeminovnıñ davasında dinşınas Timur Urazmetovnı sorğuğa çekti. O, umumiy tilşınaslıq-dinşınaslıq ekspertizasını azırlağan gruppa erkânına kirgen edi. Bu ekspertiza cinaiy davanıñ temeli oldı. Bu aqta advokat Edem Semedlâyev bildirdi.
«İslâm ifadelerinen bağlı hulâsa, neticelerni islâmnı kütken, dinniñ inceliklerini añlağan insan çıqarmalı, dep israr etemiz. Bu mütehassısnıñ islâmnen bağlı belli bilgileri olmalı, tek bunıñ kibi dinşınaslıq ekspertizalarını yapmağa aqqı olğanını tüşüngen medeniyetşınas, tarih ocası, «Hizb ut-Tahrir» firqasınen bağlı bir qaç işniñ müellifi olmaq yeterli degil», – dep tarif etti advokat.
Kelecek oturışuvda Memedeminovnıñ imayesi ekspertiza dava delili olamaz, dep israr etecek ola. Bundan ğayrı, advokat Semedlâyev dava malümatlarına Nariman Memedeminovğa nisbeten tizilgen 10-ğa yaqın hasiyetname qoştı, olarnıñ arasında bölge memurı, köy şurası ve 55 köydeşiniñ hasiyetnamesi bar.
«Olar tek müsbet», – dep qoştı advokat.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
