Vatandaş jurnalisti, «Qırım birdemliginiñ» strimeri Ayder Kadırov Qırımdaki Rusiye mahkemesiniñ onı «çaqmağanında» qabaatlap para cezasını bermek qararını «qanunsızlıq» dep saya.
Bu aqta «Qırım birdemligi» cemaat birleşmesi Qırım.Aqiqatqa bildirdi.
«Halqıma ve maña qarşı yapılğan qanunsızlıqtır. Bunı külünçli ve aqılsız dep sayam», – dep bildire Kadırovnıñ aytqanlarını faaller.
Birleşme, FSB qırımtatarını «VKontakte» içtimaiy ağı vastasınen Umicon Dadaconovnıñ saifesinen bağda olğanını qabaatlay, dep hatırlattı. Mahsus hızmetlerniñ fikirince, Dadaconov Iraqta cenkte iştirak etti, Kadırov ise bunı haber etmek kerek edi.
Faallerniñ malümatına köre, Ayder Kadırov qayda cinayet yapqanını añlamay, çünki daa 2015 senesi yazışqan edi – qayd etilgen Rusiye Ceza kodeksiniñ maddesi 2016 senesi işke tüşürildi.
Kadırov, cinayet yapqanından şübheli sayılğan Dadaconovnen bir plan ya da areketlerni muzakere etmegen edi, dep ayta.
«Qırım birdemligi» mayısnıñ 14-nde çıqarılğan 30 biñ para cezası ükmü qabaatlayıcı taraf talap etken 25 biñ ruble para cezasından ziyade oldı, dep bildirdi.
Ayder Kadırov bu mahkeme qararına qarşı istinaf şikâyetini bermege niyetlene.
Mayısnıñ 14-nde saba Qırımnıñ Seyitler rayon mahkemesi 34 yaşında yerli sakinni «çaqmağanında» qabaatlap, 30 biñ ruble para cezasını berdi. Qabaatlanğannıñ adı ve soyadı aytılmadı.
2020 senesi avgustnıñ 31-nde Rusiye quvetçileri Sudaqta, İçki ve Seyitler rayonlarında qırımtatarlarnıñ – Enver Topçi, Ayder Ablâkimov, Ridvan Umerov ve Ayder Kadırovnıñ evlerini tintti.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña binaen, 100 biñ ruble para cezası ya da bir yıl mecburiy işler, ya da aynı müddetli apis cezası berile bile.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
2021 senesi aprelniñ 15-nde Seyitler rayon mahkemesi «çaqmama davası» boyunca qabaatlanğan vatandaş jurnalisti, «Qırım birdemliginiñ» strimeri Ayder Kadırovnıñ davası boyunca üç imaye muracaatını red etti. Bundan evel Rusiye kontrolindeki İçki rayon mahkemesi aynı maddege istinaden qabaatlanğan Enver Topçini 40 biñ ruble para cezasına üküm etti.
