Sentâbrniñ 16-nda Varşavada başlağan insan ölçevini esaplav boyunca er yıl keçirilgen OSCE toplaşuvında Rusiye akimiyetini ve yarımadanıñ teşkilâtlarını temsil etecek işğal etilgen Qırım vekilleri qayd etildi. Bu aqta Qırımtatar Milliy Meclisiniñ reisi Refat Çubarov Facebookta yazdı.
«Rusiye bu sene de işğal etken Qırımnıñ diplomatik tecritini «yırtıp çıqmağa» tırışa. Rusiye OSCE meydançıqlarını, hususan OSCE institutlarınıñ ayrı liberalligi sebebinden, eñ kelişken soyu dep saya. Böylece, bu sene Rusiye tarafı Toplaşuv çerçivesindeki tedbirlerde iştirak etmek içün Qırımnıñ işğalci akimiyetini temsil etecek bir sıra yerli teşkilât ve işbirlikçilerni qayd etti», – dep yazdı Çubarov.
O, işğal etilgen Qırımdan qayd etilgen iştirakçilerni aydınlattı. Umumen 14 insan.
Olarnıñ arasında sentâbrniñ 16-nda toplaşuvda iştirak etken «P. Hilendarsköy regional bulğar milliy-medeniy muhtariyetinden» Lüdmila Radeva, «Krımskaya gazeta» ve «Krımskiy jurnal» baş muarriri Mariya Volkonskaya, «Krımskoye informatsionno agentstvo» neşirinden Olga Leonova.
Varşavada sentâbrniñ 16-nda sentâbrniñ 27-ne qadar devam etecek insan ölçeviniñ esabı boyunca OSCE toplaşuvı başladı. Bu toplaşuvda Rusiye Tış işler nazirliginiñ işğal altındaki yarımadada qırımtatarlarnıñ zemaneviy vaziyetine dair maruzası diñlenildi. OSCE saytındaki kün tertibinde haber etilgenine köre, Rusiye böyle maruzanı sentâbrniñ 24-nde taqdim etmeli. Rusiye Tış işler nazirliginiñ saytında işbu maruza aqqında haber etilmey.
ABD Devlet departamenti sentâbrniñ 25-nde Qırımda insan aqlarınıñ halqara monitoringine çağıracaq, dep beklenile.
Rusiyeniñ Qırım işğalinden soñ Ukrainağa qoltutqan ve qırımtatar faalleri sıq-sıq taqip etile. Bu aqta aq qorçalayıcılar bildire. Olar Kremlni insan aqlarınıñ bozuluvını toqtatmağa çağıra. Amma Moskva ve Qırımnıñ Rusiye akimiyeti repressiyalar olğanını inkâr ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
