Varşavada Rusiye 2014 senesi fevralniñ 20-nde Qırım işğalini başlağanına dair plakatlar peyda oldı. Bu aqta «Euromaydan-Varşava» teşkilâtınıñ lideri Natalya Pançenko Qırım.Aqiqatqa bildirdi.
Plakatlarda «2014 senesi fevralniñ 20-nde Rusiye Ukrainağa ait Qırımnı işğal etip başladı. Putin ücüm etecek nevbetteki memleket angisi?» dep yazılğan. Anda #LiberateCrimea halqara aktsiyasınıñ heştegi de mevcut.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
