«Qırımlı musulmanlar davası» boyunca 11 yılğa azatlıqtan marum etilgen qırımlı islâm ilimleri ve arap tili magistri Vadim Bektemirovnı Rusiyeniñ Sankt-Peterburg №6 koloniyasında Rusiye Federatsiyası Cezalarnı yerine ketirüv federal hızmetiniñ hadimleri köteklep, ilâclarını ve Qurannı alğanlar. Bu aqta «Qırım birdemligi» cemaat birleşmesi ömür arqadaşı Lemara Bektemirovanıñ malümatına esaslanıp bildire.
Lemara Bektemirova aqayı köteklengenini soñra bildi. Aqayı karantinden çıqqan soñ taksofondan telefon etip oldı. Onıñ aytqanına köre, şimdi «alı bir qarar ve namaz qılmağa izin bereler». Lemara Bektemirova kim kötekledi bilmey, dep yaza «Qırım birdemligi».
Vadim Bektemirov 2023 senesi noyabrniñ 16-nda Sankt-Peterburgnıñ №6 koloniyasına etap etildi – bunı Bektemirovnıñ ömür arqadaşına koloniya yolbaşçısı Konstantin Bubnov bildirdi. Qırımtatarınıñ Lipetsk vilâyetindeki Yelets şeerinden etap etilgeni sentâbrniñ 21-nde belli edi, amma koloniya memuriyetinden mektüp Lemara Bektemirovağa tek noyabrniñ 20-nde keldi.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
