Siyasiy mabüsniñ qorantası bir aydan berli bir haber alamay ve bulunğan yerini bilmey. Sentâbrniñ 21-nde aynı kamerada olğan Vladlen Abdulkadırov «Zonatelekom» apishane bağı vastasınen Bektemirov başqa koloniyağa etap etildi, dep bildirdi. Ailesine resmiy bir haber berilmedi. Lemara Bektemirova Rusiyeniñ Cezalarnı yerine ketirüv federal hızmetine mektüp yazıp, aqayınıñ bulunğan yerini bilmege tırıştı.
Rusiyeniñ Cezalarnı yerine ketirüv federal hızmeti soy-soplarına «apishanelerde cezasını çekken ve tahqiqat izolâtorında tutulğan şahıslarnı ayrı-ayrı taqip etmey», dep cevap berdi.
«Bugün bir haber yoq. Rusiyeniñ sert rejimli koloniyalarına çoq yazdım, bazıları cevap bermey, bazılarında elektron mektüpler çalışmay, digerleri böyle biri yoq, dep cevap bere», – dep tarif ete Lemara Bektemirova.
2020 senesi iyülniñ 7-nde Rusiye uquq qoruyıcıları yedi qırımtatarını tuttı: Emil Ziyadinov, İsmet İbragimov, Zekirya Muratov, Vadim Bektemirov, Alim Sufyanov, Seyran Hayretdinov mahkemede apiske alındı ve Aqmescit tahqiqat izolâtorına avuştırıldı. 1-inci derece saqatı olğan Aleksandr Sizikov ev apsine alındı. Tutulğanlar Rusiyede yasaqlanğan «Hizb ut-Tahrir» diniy teşkilâtı ile alâqaları bar olğanında qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
