Rusiyeniñ Rostov-na-Donu Cenübiy okrugınıñ arbiy mahkemesi «qırımlı musulmanlar davasınıñ» mabüsi Vadim Bektemirovnı 11 yıl sert rejimli koloniyada qalmasına üküm etti, dep haber ete «Qırım birdemligi» cemaat birleşmesi.
«Vadim soñki sözünde qabaatlayıcı ükümden ğayrı bir şey beklemey ve apiske alınğan ilk kününden berli bunıñ soñu ne olacaq bile ve añlay edi, dep ayttı. O, qabaatını tanımadı… Biz FSB provokatsiyası olğanını isbatladıq, bütün gizli şaatlar – FSB agentleridir, olar bir davadan başqasına keçeler. Er şey mahkemege bildirildi, amma qarar alındı», – dedi Bektemirovnıñ advokatı Emil Kurbedinov.
Daa evel berilgen malümatqa köre, Rusiye polisiniñ hadimleri qırımlı Zekirya Muratov ve Vadim Bektemirovnıñ üküm çıqarıluvına kelgen üç vatandaş jurnalistini tuttı.
Fevralniñ 11-nde Rostov-na-Donu Cenübiy okrugınıñ arbiy mahkemesi «qırımlı musulmanlar davasınıñ» mabüsi Zekirya Muratovnı 11 yıl ve 6 ay sert rejimli koloniyada qalmasına üküm etti.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
