Rusiyeniñ Leningrad vilâyetiniñ valisi Aleksandr Drozdenko uçucısızlarnıñ ücüminden soñ Ust-Luga cermay limanındaki zararlar aqqında bildirdi.
Onıñ aytqanına köre, Kirov rayonınıñ Molodtsovo qasabasında üç mesken evde (umumen 30 dairege qadar), tamirde bulunğan orta mektepniñ eki odası ve İçtimaiy qoruv merkeziniñ binasında camlar zarar kördi. Üç kişi yaralandı, ekisi bala. Hastahane ihtiyacları olmadı. Bundan ğayrı, garaj ve qazan dairesi rayonında çıqqan yanğınlar söndürildi, dep yazdı o.
Drozdenkonıñ malümatına köre, saat 6:00-ğa qadar ava mudafaası regionda 38 dronnı urıp tüşürdi.
2026 senesi martnıñ 25-nden başlap Ukrayina uçucısızları aman-aman er kün Ust-Luga limanına ücüm ete. Birinci ücümden soñ, Astranıñ malümatına köre, üç cermay tankeri, beş yaqarlıq rezervuarı, üç iskele ve "Novateka" infrastrukturası zarar kördi.
Martnıñ 30-nda Drozdenko region limanları "işine devam ete, dostane memleketlerge cermay malları, gazohimiya mahsulatı, kübre endire", dep aytqan edi.
Shot Rusiye Telegram kanalı yazğanına köre, Samara ve vilâyetinde küçlü patlavlar oldı. İlk malümatqa köre, regionda bir qaç ava nişanı tüşürildi. Ücüm aqibetleri aqqında aytılmadı. Martnıñ 29-na keçer gecesi uçucısızlar regionğa endi ücüm etken edi. Astra "Tolyattikauçuk" ve "KuybışevAzot" eki himik müessisesi Ateşke oğradı, dep bildirgen edi.