Uçucısızlar Rusiyeniñ Leningrad vilâyetindeki Ust-Luga limanına kene ücüm etti. Vilâyetniñ valisi Aleksandr Drozdenko haber etkenine köre, ava mudafaasınıñ quvetleri regionda 22 dronnı urıp tüşürdi.
Exilenova+ Ukrayina monitoring kanalı yazğanına köre, Ust-Luga limanı ücümge oğradı. Bu aqta ASTRA Telegram kanalı haber ete.
Bloomberg agentligi aprelniñ 5-nde yazğanına köre, Ust-Luga limanı bir qaç künlik aradan soñ cermay yüklenmesini yañıdan başlattı.
2026 senesi martnıñ 25-nden başlap Ukrayina uçucısızları Ust-Luga limanına bir qaç kere ücüm etti. Bu Baltikada Rusiye esas deñiz limanlarından bir danesi, Rusiye andan ham cermay ve cermay mallarını ihrac ete, em de kölge flotunıñ gemilerini qullanıp.
Martnıñ 30-nda Azatlıq Radiosınıñ "Shemı" leyhası Planet Labs uydu fotoresimlerini derc etti. Olar Rusiyedeki Primorsk ve Ust-Lugada cermay terminallarında yanğınlar devam etkenini köstere. Resimlerde martnıñ 29-nda Ukrayina darbelerinden soñ martnıñ 25-nde olğan ücümlerde zarar körmegen "Novatek-Ust-Luga" zavodınıñ rezervuarlarınıñ yanğanı körüne.
Rusiyeniñ büyük istilâsı başlağan soñ Rusiyedeki çeşit obyektler avadan ücümge oğray. Eñ sıq 2024 ve 2025 seneleri ücüm nişanı cermay zavodları ola. Ukrayinanıñ işğal etilgen topraqlarında da Rusiye obyektleri ücümge oğray.
Ukrayina Silâlı quvetleriniñ Baş ştabı ücümlerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ cenk imkânlarını eksiltecek ve Rusiyeni Ukrayinağa qarşı silâlı istilâsını toqtatmasına mecbur etecek tedbirlerni muntazam sürette yapa", dep bildirgen edi.