Stenford universitetiniñ professorı, felsefeci, siyasetçi ve publitsist Frensis Fukuyama Ukrayina silâlı quvetleriniñ cenüpte oñğanlığı ve Qırım ile memuriy sıñırğa çıqması Rusiye ile cenkniñ siyasiy tarzda al etilmesine yol açacaq dep saya.
Böyle fikirni o Dmıtro Gordonğa intervyü berir eken bildirdi.
"Men kelecekni körgenlerden degilim ve böyle bir zenaat yoqtır da dep belleyim. Amma Ukrayina cenüpteki Rusiye mudafaasını muvafaqiyetnen keçip olacağını sayam", - dep bildirdi Fukuyama.
Aynı zamanda Fukuyama Ukrayina cenübinde oñğanlıq ve Qırım ile memuriy sıñırğa kelüv "keç degil de, evelce olacaq" dep saya.
"Bunıñ olğanınen ve Qırım ya da azat etilgende ya da qamaçavğa alınğanda vaziyetniñ siyasiy a etilüvi içün yol açılacağını belleyim", - dep qoştı o.
Evel Ukrayina Baş istihbarat idaresiniñ yolbaşçısı Kırılo Budanov Qırımnıñ azat etilüvi em siyasiy em arbiy yolnen olacaq dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
