USQ-niñ mahsus operatsiyalar quvetleri cenk vaqtında ilk sefer Rusiyeniñ eñ yañı R-416GM bağ stantsiyasını urdı. Bu, komandanlıq noqtası ve Rusiye ordusınıñ bölükleri arasındaki bağnı bozdı, dep bildire SSO komandanlığı iyünniñ 13-nde saba.
"Rusiye ordusı bu kompleksni 2018 senesi qullanıp başlağanı belli. Deñiştirilgen stantsiya, radio reley alâqası bölükleriniñ tarla şaraitlerinde işiniñ semereliligini arttırmaq içün işlep çıqarıldı", — dep qayd ettiler ukrain arbiyleri.
Mahsus operatsiyalar quvetleri, eñ yañı işlep çıqarılğan usullardan birini qullanğanlarını ilâve ettiler.
İyünniñ 12-nde Ukrayina Silâlı quvetleriniñ Baş ştabı, Aqyar civarında S-400 zenit-raketa kompleksleriniñ eki divizionına ve S-300 ZRK bir divizionına darbe endirilgenini bildirdi.
Bundan evel haber etilgenine köre, iyün 10-na keçken gecesi Ukrayina mudafaa quvetleri Canköy rayonında S-400 zenit-raketa kompleksiniñ divizionına ve Qara deñiz ve Kezlev civarında eki S-300-ge ücüm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
