Belarusnıñ Gomel şeerinde Rusiyeniñ ilhaq etken Qırımğa silâ, arbiy tehnika ve arbiy yedekler ile daa bir eşelon kelip çıqtı. Bunı oktâbrniñ 14-nde Ukrayina Sidlâlı Quvetleriniñ Baş ştabı haber etti.
"Belarus Cumhuriyetiniñ reberligi Ukrayina topraqlarında arbiy tecavuznıñ ömürge keçirilmesi içün Rusiye Federatsiyasına yardım etmege devam ete", - dep haber etile malümatta.
Aynı zamanda, USQ Baş ştabı, Qırımda Rusiye akimiyeti "müzeylerniñ tahliyesini tayin etken" ferman çıqarğanını bildirdi.
"Hususan, muvaqqat şğal etilgen bölgedeki müzeyler içün iç (işğal etilgen bölge içinde) ve tış (Rusiye Federatsiyası topraqlarına) tahliye planları tayin etilgen. Eñ büyük maddiy degeri olğan eksponatlar ilk nevbette tahliye etilecek", - dep yazıla bildirmede.
Resmiy olaraq Qırımnıñ Rusiye akimiyeti yarımadanıñ müzeyleriniñ tahliyesine azırlıq aqqında malümat bermediler.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
