Ukrain boksçu Oleksandr Usik Dünya Boks Birleşmesiniñ (WBA) dünya çempionı unvanını inkâr etip, rusiyeli Denis Lebedevnen uruştan vazgeçti. Bu aqta sportçu öz Facebook saifesinde yazdı.
“WBA teşkilâtı meni Lebedevnen uruş keçirmege mecburlay. Bu uruş olmaycaq, çünki biz taqımımız ile super ağır çekige keçmege qarar aldıq, bu sebepten biz Denisnen boks yapıp olamacaqmız. Men quşaqnı red etem, o mende boştan-boş olğanını istemeyim, başqa yigitler onıñ içün boks etsin. Deniske ve bu quşaq içün dögüşecek balalarğa muvafaqiyet tilleyim, uruşıñız, qazanıñız”, - dep yazdı Usik.
2018 senesi noyabrniñ 11-nde Usik britaniyalı Toni Bellyüni Mançesterde nokaut etip, 90,7 kilogrammğa qadarki çekide mutlaq dünya çempionı unvanını qorçaladı. Usik WBC, WBA, WBO, IBF versiyalarına köre çempion quşağını ve The Ring mecmuasınıñ unvanını qorçaladı.
Daa evel Aleksandr Usik 90,7 kilogrammğa qadar çekide dünyanıñ mutlaq çempionı oldı. Ukrainalılarnıñ dünya boks superseriyasınıñ final uruşında rusiyeli Murat Gassiyev ile yarışlaştı. 12 raund neticelerine köre Aleksandr Usik akemlerniñ qararı ile ğalebe qazandı.
