WBA, WBO, WBA ve IBF versiyalarına köre pek ağır çekide dünya çempionı, Ukrainanıñ qırımlı boksçısı Aleksandr Usik Rusiyeniñ Ukrainağa qarşı ücüm sebebinden Ukraina silâlı quvetleriniñ territorial mudafaasına qoşuldı, çünki «bu onıñ borcu – ev ve qorantanı qorumaq».
«Men ög sırağa cenkleşmege ketmedim de. Ömür arqadaşım, balalarım, tuvğanlarımnı qorçalayım. Bundan para qazanmağa istegen alçaqlar bar, soğuncılar. Biz insanlarğa yardım etemiz. Çünki bu menim borcum. Men mecburım, men – er adamım», – dedi Usik.
Onıñ qayd etkenine köre, o, «kerek olsa, can almağa azır».
«Menim ya da tuvğanlarımnıñ ayatını almağa isteseler, bunı (ayat almağa – QA) yapmağa mecbur olacam. Men ateş açmağa istemeyim, kimseni öldürmege istemeyim, amma meni öldürseler, başqa çarem qalmaycaq», – dedi Usik.
Aleksandr Usik fevralniñ 24-nde başlağan Rusiyeniñ Ukrainağa yañı ücüminen bağlı muracaat yaptı.
Ukrainada Rusiye ücüm etken soñ arbiy vaziyet ilân etildi (2022 senesi fevralniñ 24-ü saba saat 5:00-dan başlap 30 künge). Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete ve «Ukrainanı askeriysizleştirüv ve denatsifikatsiya» ola, dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
