Ukrain boksörı Oleksandr Usik, Rusiye boksörı Andrey Fedosovnen uruştan vazgeçti, çünki sport yarışınıñ siyasiy alanğa çevirilmesini istemey, ayttı Usik avgustnıñ 23-ınde Instagram storislerinde
"Raqibim Andrey Fedosov olacaq, dep haber ete ediler. Yoq. O, menim raqibim olmaycaq. Ne içün? Daa bundan evel mennen Aleksandr Povetkin boks etecek, dep muzakere ete ediler... Men, bu balalarnen uruşmağa istemegenimi aytqan edim, çünki boksnı mıtlaq siyasetke çevirirler ve bir birine çirkin-çirkin laflar aytacaqlar. Men bunı istemeyim, maña bu kerekmey", – dedi Usik.
Boksör, Rusiye sportçuları ve olarnıñ qorantalarına munasebeti yahşı olğanını ayta, amma "eki taraftan olacaq pis laflarnı" istemey, dep qoştı.
Daa evel BoxingScene, Usik, super ağır çekide ilk uruşını oktâbr 12-sinde Çikagoda Wintrust Arenasında Fedosovnen yapacaq, dep bildire ediler.
2018 senesi noyabrniñ 11-nde Usik britaniyalı Toni Bellyüni Mançesterde nokaut etip, 90,7 kilogrammğa qadarki çekide mutlaq dünya çempionı unvanını qorçaladı. Usik WBC, WBA, WBO, IBF versiyalarına köre çempion quşağını ve The Ring mecmuasınıñ unvanını qorçaladı.
Daa evel Aleksandr Usik 90,7 kilogrammğa qadar çekide dünyanıñ mutlaq çempionı oldı. Ukrainalılarnıñ dünya boks superseriyasınıñ final uruşında rusiyeli Murat Gassiyev ile yarışlaştı. 12 raund neticelerine köre Aleksandr Usik akemlerniñ qararı ile ğalebe qazandı.
