Kyivde Rusiyeniñ büyük istilâsı başlağan ilk künü elâk olğan ukrayınalı arbiy Usein Muhtarovnen vedalaşuv tedbiri keçirildi. Bu aqta Lugansk sıñır otrâdı polkovnik Yevğen Pikus adından haber ete.
31 yaşında Muhtarovnıñ baş serjant rutbesi bar edi, 2018 senesinden berli granata atıcınıñ yardımcısı ve sıñırcı edi. Çmırovka köyü civarında saruvdan çıqqanda elâk oldı.
Uzun vaqıt arbiyniñ cesedi Rusiye işğal etken topraqta qala edi, amma yaqında onı qaytarıp, elâk olğannıñ şahsiyetini belgilep oldılar.
Arbiy ölümden soñ III derece «Cesaret» nişanınen taqdirlendi.
«Usein qırımtatarı ve onı İslâm ananelerine köre cemiyet ve Qırımtatar Milliy Meclisiniñ reisi Refat Çubarovnıñ iştirakinen defin etkenler», – dep aytıla haberde.
Çubarov vedalaşuv tedbirini ilân etip, tuvğanları ve arbiy qardaşlarına taziyeler bildirdi.
Daa evel belli olğanına köre, Zaporijjâ yönelişinde aqyarlı Vsevolod Grabar elâk oldı. O, Şevçenko Kyiv milliy universitetiniñ coğrafiya fakültetiniñ geodeziya ve haritaşınaslıq kafedrasınıñ mezunı ola. Apayı ve eki balası qaldı.
2022 senesi dekabr ayınıñ soñunda Lugansk vilâyetinde qırımlı, vatandaş faali, sabıq siyasiy mabüs Gennadiy Afanasyev (tahallüsi «Tor») elâk oldı, dep haber etildi. O, Ukrayına Silâlı quvetleriniñ 241-inci brigadasınıñ territorial mudafaasınıñ 130-ıncı batalyonında cenkleşti. Afanasyev Rusiyeniñ Ukrayınağa qarşı arbiy istilâsınıñ ilk künü arbiy komissarlıqqa ketti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
