Ukrainanıñ 10 vilâyetinde cenk vaziyeti kirsetilgeninden soñ, Ukrainağa kelgen Rusiye vatandaslarınıñ sayısı üç kerege azlaştı. UA:TV televizion kanalına Devlet Sıñır Hızmetiniñ reisi Petro Tsigikal aytqanına köre, evel Ukrainağa 5000 Rusiye vatandaşı kirse, “şimdi biz künde tek 1300 keçiremiz”.
Cenk vaziyetiniñ ilân etilgeninden başlap ve dekabr 3-ünece, 600-den ziyade rusiyelige Ukrainağa kiriş yasaqlandı dep bildire Tsigikal.
Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti. Cenk vaziyeti devam etkence Ukrainağa 16 yaşından 60 yaşına qadar Rusiye erkek vatandaşları kirsetilmecek.
Devlet sıñır hızmetinde, olarnı sübet ve vesiqa teşkerüvinden soñ ayrı allarda keçire bileceklerini qayd ettiler. Sıñır keçken adamlarnıñ aytqanına köre, atta qadınlarnı da er vaqıt sıñırdan keçirmeyler.
Ukraina Arbiy deñiz quvetleri bildirgenine köre, noyabr 25-te Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Ukraina Arbiy deñiz quvetleri bildirgenine köre, noyabr 25-te Rusiye sıñır gemileri, Keriç boğazınıñ neytral suvlarında ukrain gemilerine attı ve olarnı zapt etti. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Bütün arbiylerni Moskovadaki "Lefortovo" apishanesine alıp kettiler.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
