"Bizler Rusiye Federatsiyasını Tofik Abdülgaziyevni ve vaqtınca işğal etilgen Qırımda qanunsız tutulğan diger siyasiy mabüslerni onıñ kritik sağlıq vaziyeti sebebinden azat etmege, vaqtınca işğal etilgen topraqlarda siyasiy baqışları, jurnalist faaliyeti, faalligi ve dini sebebinden insanlarnıñ taqip etilmesini toqtatmağa çağıramız", — dep aytıla beyanatta.
Uquq qoruyıcılar Ukrayina akimiyetinden Tofik Abdülgaziyevni deñişim cedveline kirsetilmesini ve onıñ azat etilmesi meselesinde faal areket etmesini rica eteler.
Beyanatnı ZMINA insan aqları merkezi, Vatandaş serbestligi merkezi, İnsan aqları Ukrayina Helsinki birligi, "Qırım insan aqları evi" cemaat birligi, "Diya" aq qorçalayıcı merkezi, Kremlniñ siyasiy mabüslerniñ tuvğanları birligi ve Qırım aq qorçalayıcı gruppası imzaladılar.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
