Uquq qoruyıcılar Rusiye apishanelerinde tutulğan qırımlı siyasiy mabüslerni qorçalamağa tırışmalı, çünki şimdilik olarnı deñiştirmek ya da azat etmek imkân yoq. Bu fikirni qırımtatar uquq qoruyıcısı Lutfiye Zudiyeva ''Suspilne Qırım''ğa bergen izaatında bildirdi.
"Şimdilik Qırımda siyasiy mabüslerni azat etüv ve deñiştirüv istiqballeri olmağanı içün, biz bu insanlarnı apishanelerde, cezahanelerde qorçalamağa ve immunitetlerini quvetleştirmege tırışmaq kerekmiz", - dedi Zudiyeva.
Qırımtatar uquq qoruyıcınıñ aytqanına köre, al-azırda bu maqsatqa irişmek içün bir qaç adımnıñ amelge keçirilmesi üzerinde iş yapıla.
''Birinci, Rusiye Federatsiyasınıñ cinaiy-protsessual qanunnamesi RF toprağında çalışqan çetel devletlerniñ diplomatlarına cezahane ve apishanelerge kirmege ve muayyen siyasiy mabüslerni ziyaret etmege ruhset bere. Eger biz buña irişip olsaq, bu siyasiy mabüslerge büyük destek olur ve siyasiy mabüsler mevzusını başqa malümat seviyesine köterecek'', - dep qayd etti uquq qoruyıcı.
Zudiyevanıñ aytqanına köre, daa bir müim adım - "Qızıl haç" hadimlerinden Qırımdan siyasiy mabüslerni öz nezareti altına almasına irişmektir.
''Olarnıñ bayağı keñ vekâletleri ve imkânları bar. Olar, eñ azından, mustaqil ekimlerniñ apishanelerde ve cezahanelerde bulunmasına ya da apishanelerniñ şaraitleriniñ nezareti ve nezaretine tesir ete bileler. Tış devletlerniñ diplomatlarınıñ siyasiy sebeplerden açılğan cinaiy davalar boyunca diñlevlerde, munaqaşalarda ve ükümlerde bulunması da müimdir, elçilik temsilcileri bu insanlarnıñ ikâyelerini daa açıq ete bileler ve bu ikâyeler aqqında diplomatik kanallar vastasınen ayta bileler", - dep qoştı Zudiyeva.
Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva 2023 senesindeki iş neticelerine bağışlanğan brifingde bildirgenine köre, 2023 senesi dekabr ayınıñ soñuna qadar Qırım sakinlerine nisbeten siyasiy sebeplerden azatlıqtan marum etüvniñ 191 adisesi qayd etildi, olardan 123 - qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
