2023 yılınıñ ekinci yarısında Ukrayına akimiyeti Qırımnı işğalden qurtaruv ve reintegratsiya strategiyasınıñ yañı vesiqasını qabul etecek ola. Bu aqta Ukrayına prezidentiniñ Qırım Muhtar Cumhuriyetindeki temsilcisi Tamila Taşeva «Svoboda.Utro» yayınında ayttı.
«Milliy telükesizlik ve mudafaa şurasınen beraber 2021 senesi qabul etilgen işğalden qurtaruv strategiyasına belli deñişmeler kirsetmek kerek, dep muzakere etemiz… anda esas mehanizm siyasiy-diplomatik olaraq qayd etilgen edi. Tam istilâdan soñ bu strategiya deñişmelerge muhtac, bunı añlaymız. Qavrayış qala, amma bazı deñişmelerni kirsetmege planlaştıramız, hususan bundan evel de azırlağan programma vesiqalarımızğa. Şu cümleden, iqtisadiy yañaruv strategiyası», – dep qayd etti o.
Taşeva Ukrayına Milliy telükesizlik ve mudafaa şurasınıñ kâtibi Oleksiy Danılov aydınlatqan «Qırımnı işğalden qurtaruvnıñ 12 adımını» izaatladı. Onıñ aytqanına köre, plannıñ bazı noqtaları da deñiştirilecek.
«Bir çoq yerni Milliy telükesizlik şurasınen muzakere ettik. Danılov bazı şeylerniñ böyle parlaq taqdim etilüvini seve. Aslında, uquqiy vesiqa bam-başqa olacaq. Ve, ebet, çoq şey muzakere etilmeli, çünki Danılov seslendirgen bir çoq maddede farqlı fikirlerim bar. Qavrayış öyle, amma belli bir seviyede belgilenmeli», – dep ayttı prezidentniñ vekili.
Hususan lüstratsiya esaslarınen bağlı. Taşevanıñ fikirince, olar Rusiye memuriyetiniñ alçaq vazifelerinde ve yüksek vazifelerde çalışqanlar içün farqlı olmalı.
«Ebet, Aksenov, Konstantinov. Bu insanlar reberlik vazifelerinde olıp, yarımadada işğalci rejimge yardım etken qararlar alğan edi. Meselâ, Qırımnıñ tabiiy zenginliklerini hırsızladı. Ebet, anda sual da yoq. Cinaiy mesüliyetke çekilmeliler. Amma alçaq vazifelerde tek emirlerni yerine ketirgenler bar edi. Meselâ, köy şurasınıñ muasebecisi, başqa yerde çalışmağa imkânı yoq edi. Onı cinaiy mesüliyetke çekmek kerekmi? Büyük ihtimalnen, yoq», – dep ayttı o.
Ukrayına milliy telükesizlik ve mudafaa şurasınıñ kâtibi Oleksis Danılov «Qırımnı işğalden qurtaruvnıñ 12 adımı» adlı paylaşuv yaptı. Tekliflerden biri – «rus şanı şeerine» «№6 Obyekt» adınıñ berilüvi.
Bundan ğayrı, Danılov Qırımda «rus arbiy gemisi …….. kete» abidesini tiklemege, 2014 senesinden soñ yarımadağa kelgen Rusiye vatandaşlarını yarımadadan quvmağa ve Keriç köprüni bozmağa teklif ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
