Uquqçılar Lilâ Gemeci ve Rustem Kâmilevniñ evinde keçirilgen tintüv ve Kâmilevniñ apiske alınuvı sebebinden aq qorçalayıcılar bir beyanat yaptı. Bu aqta «KrımSOS» yaza.
Beyanatta qayd etilgenine köre, Qırımda aq qorçalayıcılar Rusiye akimiyeti tarafından muntazam sürette taqip etile, böyle etip olarnı faaliyetlerini toqtatmağa ya da işbirligi yapmağa mecbur etecek olalar.
Aq qorçalayıcılar halqara teşkilâtlarğa ve tış ükümetlerge böyle talaplarnen muracaat ettiler:
- Qırımda Gemeci, Kâmilev ve diger advokatlarğa yapılğan repressiyalarnı qararlı bir şekilde qabaatlamaq ve Rusiye akimiyetinden olarnıñ qanunsız taqibini toqtatmasını talap etmek.
- Yarımadada insan aqlarınıñ qaba bozuluvından mesuliyetli olğanlarğa, hususan Qırımda siyasiy taqiplernen oğraşqan Rusiye ekstremizm ile küreş merkeziniñ hadimlerine, qadılarğa ve tedqiqatçılarğa qarşı şahsiy sanktsiyalar kirsetmek.
- Zenaat faaliyeti içün repressiyağa oğrağan advokatlar, aq qorçalayıcılar, faallerge ve olarnıñ qorantalarına yardım etmek.
- Qabaatlılarnı mesüliyetke çekmege yardım etmek içün yarımadada insan aqları vaziyetini közetmege devam etmek, insan aqları bozuluvlarını ve cenk cinayetlerini vesiqalaştırmaq.
Bir kün evelsi «Qırım birdemligi» cemaat areketiniñ uquqçıları Rustem Kâmilev ve Lilâ Gemeciniñ evine Rusiye polis hadimleri keldi.
Tintüvlerden soñ Kâmilevni tutıp, Aqmescit şeerindeki Ekstremizm ile küreş merkezine alıp kettiler, anda eki memuriy protokol tizildi. Birisi 2020 senesi paylaşuvnen bağlıdır. Bu yazıda ukrayin faali Oleg Prihodko aqqında aytıldı. Fotoresimde Prihodko bayraq ve Trizub resimi olğan kâğıtnı tutıp tura.
Soñra Kâmilev Rusiye mahkemesine yollanıldı, anda «natsist timsalleriniñ propagandası ya da açıq numayış etilüvi» maddesine istinaden 10 künge apiske alındı ve Rusiye ordusınıñ «itibardan tüşürilüvi» iddia etilgeni içün 50 biñ ruble para cezasını aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
