Rusiye Yuqarı mahkemesi ukrayin uquq quruyıcısı Maksim Butkeviçke çıqarılğan ükümni deñiştirmedi: 13 yıl koloniya cezası. Bu aqta mahkeme zalından "Mediazona" haber ete.
Mahkeme oturışında Butkeviç iskence telükesi altında qabaatını tanığanını ayttı. "Bir taraftan, maña, eger men razı olsam, mahküm etilgen soñ meni qısqa müddet içinde Rusiye Federatsiyasınıñ arbiy silâlı quvetleriniñ mahküm etilgen arbiy esiri olaraq deñiştirecekler, dep aytıldı. Diger bir delil olaraq, eger men red etsem, men çeşit türlü fizikiy tesir usullarına oğraycam, dep añlatılğan edi. Bazıları maña atta kösterildi", - dedi Butkeviç.
Rusiye Ukrayinağa istilâ etken soñ Ukrayina Silâlı quvetleri saflarına kirgen uquq qoruyıcı 2023 senesi mart ayında esirlikke tüşti ve mahküm etildi. Mahkeme onı Severodonetsk şeerindeki mesken evge granatlı ateş açqanında qabaatladı. "Gratı" neşri o vaqıt Butkeviç ateş açılğan vaqıtta Kıyivde olğanını ve cenk areketleri alanına tek on künden soñ kelgenini bildirgen edi.
Bugünki mahkeme oturışında Butkeviçniñ advokatı uquq qoruyıcınıñ telefonı ile frenk qadınnıñ sorğusını bermege rica etti. Bu vesiqalar Butkeviçniñ qabaatlanğan vaqıtta Kıyivde bulunğanını isbatlay. Mahkeme olarnı davağa qoşmaqtan red etti, çünki bu "oña ait degil" eken.
Advokat qayd etti ki, mahkeme Butkeviçni yalıñız öz-özüni qabaatlağanı içün qabaatlı tanıdı, diger ekspertizalar ve deliller yoq.
Maksim Butkeviç ukrayin uquq qorçalayıcısı ve jurnalisti, qaçaqlarnıñ aqlarını qorçalamaqnen oğraşa. O, 2020 senesinden soñ Belarusten Ukrayinağa qaçqan repressiyağa oğrağan belaruslar içün migratsion qaideleriniñ deñiştirilmesiniñ tarafdarı edi. O, "Gromadske radiosı''nıñ da tesisçisi ola.
Amnesty International uquq qoruyıcı teşkilâtı Butkeviçke qarşı qabaatlavlarnı uydurılğan dep saya ve olarnı Rusiye akimiyetiniñ oña vatandaşlıq mevamı ve uquq qoruyıcı faaliyeti içün intiqam almaq istegi ile bağlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
