Qırımtatar Fazıl Emirüseinovnıñ evinde bugünki tintüv demiryolda "diversiya" davası ile bağlıdır, dep bildirdi uquq qoruyıcı Lutfiye Zudiyeva.
Onıñ sözlerine köre, Rusiye quveçileri onı yaqalamağan, amma tintüv bayağı sürgen, FSB hadimleri bütün evni yahşı etip közden keçirgen, lâkin iç bir şey tutıp almağan.
"Tintüv 10-15 daqqa evel yekünlendi. Allahqa şükür, kimseni yaqalamıdalır, esli-başlı adam evinde qaldı. Tintüv Bazarçıq köyünde demiryol hattınıñ bozulması şübesi ile açılğan cinayet dvası çerçivesinde keçirildi. Yani bu, bu davada qırımtatarlarnıñ evlerinde keçirilgen onlarnen tüntüvniñ devamıdır", - dedi o.
Daa evel Rusiye FSBsi Qırımtatar Milliy Qurultayınıñ delegatı Lemmar Yunusovnıñ evini tintken edi. Bundan evel qırımtatar Edem Murtazayev ve Memet Aşurovnıñ evlerinde de tintüv keçirilgen edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
