Bir sıra uquq qoruyıcı teşkilât Rusiye akimiyetinden Qırımda apis cezasına mahküm etilgen vatandaş jurnalisti İrına Danılovıçnı azat etmesini talap etti, Ukrayinanı ise onı deñişüv cedveline kirsetmege ve Rusige etap etilmesine yol bermemege çağırdı.
Uquq qoruyıcılar, Danılovıç 1-nci Aqmescit SİZo-sında tutulğan 14 ay devamında mustaqil ekim tarafından tayin etilgen tibbiy yardım körmegenini iddia eteler ve bunı iskence ve insaniyetsiz munasebet kibi sayalar.
Bundan ğayrı haber etilgeni kibi, yaqın zamadna Danılovıç Qırım tışına - Rusiye Federatsiyasına etap etilecek ve böylece bütünley tuvğanları ve advokattan izolâtsiya etilecek.
Uquq qoruyıcılar Rusiyeden Danılovıç ve işğal etilgen Qırım topraqlarında tutulğan diger ukrayin siyasiy mabüslerini azat etmesini, olarğa tibbiy yardım köstermesini ve taqiplerni toqtatmasını talap ete.
Ukrayina akimiyetini ise uquq qoruyıcılar Danılovıçnı deñişüv cedveline kirsetmege ve onıñ azat etilüvi oğrunda küreşmege, siyasiy mabüslerniñ azat etilüv mevzusını kün tertibinde tutmağa çağıra.
Bu muracatnı ZMINA İnsan aqları merkezi, "Qırım esnası", "QırımSOS", "Qırım uquq qoruyıcı gruppası" ve diger uquq qoruyıcı teşkilâtlar azırladı.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
