Rusiyeniñ tahqiqat izolâtorları ve koloniyalarında işğal etilgen Qırımnıñ territoriyasından doquz qadın buluna. Bunı Qırımtatar resurs merkezi bildire.
"Rusiye akimiyeti işğal etilgen yarımadada qadınlarnıñ aqlarını sıñırlay... Şimdi FSB apishanelerinde doquz qadın buluna, olardan biri qırımtatardır" , — dep aytıla haberde.
Rusiye SİZO-larında: Yelena Voynarovskaya, İrina Gorobtsova, Olga Kravçuk, Leniye Ümerova bulunalar. Koloniyalarda: Valeriya Goldenberg, İrına Danılovıç, Galına Dolgopolaya, Nina Malakova, Anna Suhonosova.
Uquq qoruyıcılarnıñ aytqanına köre, eñ zayıf gruppa tutulğan qırımlılarnıñ ömür arqadaşları, çünki qorantanıñ yekâne baqıcısı tutulğan soñ, qorantanı temin etüv mesüliyeti qadınlarğa aittir.
Siyasiy mabüslerniñ anaları ve apayları mahkemelerniñ binası ögüne kelip, tuvğanlarına qoltutmaq içün bir kişilik narazılıq aktsiyalarına çıqalar. Rusiye akimiyeti olarnı tutıp ala, tenbiley, para cezasını bere.
"Qadınlar basqılarğa oğratıla, öldürüv ve ğayıp oluv adiseleri qayd etildi", — dep qayd ettiler merkezde.
Uquq qoruyıcılar Rusiyeden ukrayin qadınlarına nisbeten diskriminatsiya ve zorbalıqnı ve bütün qırımlılarnıñ qanunsız taqip etilmesini toqtatmasını talap ete.
Bundan evel QMC, Qırım ilhaqınıñ 10 yılı devamında, uquq qoruyıcılarnıñ fikirince, siyasiy sebeplerden 320 mahküm qayd etildi, dep bildirgen edi. Olardan 217 mahkeme qararı qırımtatarlarğa nisbeten qabul etilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
