Sentâbrniñ 13-nde Rusiyeniñ İstinaf arbiy mahkemesi, 17 yılğa azatlıqtan marum etüv cezasını deñiştirmedi. Ertesi künü işğalci uquq qoruyıcılar Aleksandrni apiske aldı.
"Kör Aleksandr Sizikovnıñ apiske alınması onıñ sağlığı ve ayatı içün kerçek bir telüke yarata. Bu telükeler, mabüslerge kerekli tibbiy yardım kösterilmemesi ve Rusiye apishaneleriniñ memuriyetleri tarafından sert ve insaniyetsiz munasebet kösterilmesiniñ diger şekilleri ile daa beter ola", — dep aytıla beyanatta.
Şimdiki vaqıtta "Hizb ut-Tahrir davası"nıñ dörtünci Bağçasaray gruppasınıñ iştirakçisi Bağçasarayda vaqtınca tutuv izolâtorında buluna. Apishanede siyasiy mabüs bir özü qala. Bir kün evelsi onıñ advokatı, kör Sizikov, elini tutıp areket etkenini ve tek eki künden soñ, unitaz ve rakovina yerini añlağanını ayttı.
Rusiye qanunlarına binaen, körüvni bütünley ğayıp etken insanlarnı tüzetüv müessiselerinde cezasını çekmekten azat etmek kerek. Amma Rusiye mahkemesi Aleksandr Sizikovnı ceza izolâtorında bulunıp olğan insan olaraq tanıdı.
Bu sebepten uquq qoruyıcılar halqara toplulıqqa muracaat etip şularnı talap ete:
- Aleksandr Sizikovnı ve Ukrayinanıñ diger ağır hasta vatandaşlarını azat etmek talabınen Rusiye insan aqları vekâletlisi Tatyana Moskalkovağa talap yollamaq;
- Sizikovnıñ ve diger vatandaşlarnıñ qanunsız apis etilmesine alâqası olğan şahıslarğa qarşı şahsiy sanktsiyalar qoymaq;
- Rusiyeniñ mevcut sıñırlavlarnı bozmasına imkân bergen dünyanıñ çeşit memleketlerinden iqtisadiy subyektlerine qarşı sanktsiyalar qoymaq.
Uquq qoruyıcılar ukrayin akimiyetini de Sizikovnı deñişim cedvellerine kirsetmesine ve öz başına tutulğan vatandaşlarnıñ qorantalarına semereli şekilde qol tutmasına çağıralar.
Bundan evel Rusiye uquq qoruyıcıları belli olmağan yerge alıp ketken Sizikovnı Aqmescitteki iç bir tahqiqat izolâtorında tapamaylar, dep haber etildi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
