İyül-sentâbr ayları arasında Qırım uquq qoruyıcı gruppası, Rusiye Federatsiyası ordusınıñ "itibardan tüşürüv" maddesi ile Qırımdaki Rusiye mahkemelerine berilgen eñ az 98 memuriy davalarnı qayd etti.
Qayd etilgenine köre, 90 memuriy davada mahkeme cezalarnı para cezası ya da memuriy apis cezası şeklinde bergen.
Umumen, tam bir istilâ vaqtında Qırım uquq qoruyıcı gruppası eñ azdan 468 memuriy taqiqatnı qayd etti. Olardan 418-inde Rusiye mahkemeleri memuriy ceza qararını çıqardı.
İçtimaiy ağlardaki yazılar, taqip etüvniñ eñ tarqalğan sebeplerinden biri olıp qala. Hususan, Ukrayina milliy timsalleriniñ yerleştirilüvi içün mesüliyetke çekeler.
Uquq qoruyıcılar Qırımda yaşağanlarnıñ Rusiye ordusınıñ Ukrayinadaki areketlerine qarşı çıqqanları içün cinaiy taqiplerniñ yañı adiselerini qayd etti.
Qırım uquq qoruyıcı gruppası qayd ete ki, yarımadada "Krımskiy SMERŞ" internet-cemiyeti faal çalışmağa devam ete. Onıñ iştirakçileri Rusiye akimiyetine ve Ukrayinağa qarşı cenkke qoltutmağanlarnı taqip ete, böyle insanlar aqqında şahsiy malümat derc ete, olarğa qarşı nefret doğura, taqip etilmelerine çağıra, işğalci quvet strukturalarına şikâyet ete.
Qayd etilgenine köre, bu gruppanıñ malümatı Qırımda yaşağanlarğa qarşı cinaiy ve memuriy davalarnıñ açılmasına sebep ola.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
