Uquq qoruyıcı teşkilâtlar Qırımda Rusiye mahkemesi tarafından apis cezasına mahküm etilgen Qırımtar Milliy Meclisiniñ reisi muavini Nariman Celâl ve Asan ve Aziz Ahtemovlarnıñ Rusiye Federatsiyasına sürgün etilme telükesi aqqında bildirdiler. Bunıñ aqqında "QırımSOS" uquq qoruyıcı teşkilâtınıñ saytında haber etile.
"Malüm olğanı kibi, qanunsız sürette apis cezasına mahküm etilgen Nariman Celâl, Asan ve Aziz Ahtemovlarnı Rusiye Federatsiyasına sürgün ete bileler. Bu, Rusiyeniñ qırımtatarlarnı yarımadadan sıqıştırıp çıqarmaq kibi cinayetkâr siyasetiniñ devamıdır ve bu deral toqtatılmalıdır", - dep qayd etti teşkilâtnıñ reisi Oleksiy Tılnenko.
Uquq qoruyıcılar Rusiye akimiyetinden sürgün etilüvni yapmamağa ve Celâl ve Ahtemov qardaşlarını deral azat etmege talap eteler.
Rusiye kontrolindeki Qırım Yuqarı mahkemesi 2022 senesi sentâbrniñ 21-nde Anğarada «gaz borusındaki diversiya davasınıñ» mabüslerini uzun apis müddetlerine üküm etti: Nariman Celâl 17 yılğa ve 700 biñ ruble para cezasına, Asan Ahtemov 15 yılğa ve 500 biñ ruble para cezasına, Aziz Ahtemov 13 yılğa ve 500 biñ para cezasına üküm etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
