"Qırım esnası" uquq qorçalayıcı teşkilâtı, 2023 senesi Qırımda Rusiye ordusınıñ itibarını tüşürüv davaları boyunca taqiplerniñ orta miqdarı ayda 33 protokolnı teşkil etkenini esapladı. Bir yıl evelsi er ay 22 taqip etilgen edi.
"Tam eki yıl içinde Qırım mahkemeleri 642 davanı baqqan edi (şimdilik 700-den ziyade). Olardan 98%-ında mahkeme şahıslarnı qabaatlı tanıdı, 10 davada mahkeme taqiqatnı qanunsız müddetke ya da qanunsızlıqnıñ olmağanına köre toqtattı, eki davada ise oturış tedqiqatnıñ müddetinden tış bir künge qaldırıldı", – dep aytıla haberde.
Uquq qoruyıcılarnıñ qayd etkenine köre, taqiplerniñ çoqusı içtimaiy ağlarda Ukrayina tarafını tutqan yazılarnı derc etken şahıslarğa nisbeten yapıla. Bu vaqialar bütün qararlarnıñ 60 fayızını teşkil ete. Ekinci yerde - sözlü fikir bildirüv - 28 fayız.
"Bazı allarda itibardan tüşürüv ya da laflarnıñ Rusiye ordusına qarşı yönelüvi şübeler doğura, lâkin mahkeme iç bir kere tilşınaslıq ekspertizasını tayinlemedi", - dep qayd eteler tedqiqat müellifleri.
Rusiye Federatsiyası tam miqyaslı istilâğa başlağan soñ, Rusiye ordusınıñ "diskreditatsiyası" aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayina cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
