Cuma künü işğal etilgen Aqyarda Rusiye makemesi şeer qurucılığı, mimarcılıq, araştırma ve etraftaki müitniñ ilmiy-teşkerüv ve leyha institutınıñ baş mütehassısı Oksana Senedjuknı devlet hainligi davası boyunca 15 yıl umumiy rejimli koloniyada qalmasına üküm etti.
Rusiye tahqiqatınıñ versiyasına köre, Senedjuknı Qırım işğalinden evel Aqyarnıñ Nahimov rayonınıñ memuriyetinde çalışqan, amma 2015 senesi köçip kelgen ve onıñnen munasebette bulunğan Ukrayina mahsus hızmetiniñ agenti celp etti.
"2023 senesi mart ayında Senedjuknıñ emri ile o, Rusiye Federatsiyasınıñ Qara deñiz flotunıñ gemileriniñ bulunğan yeri aqqında malümatnı Ukrayina istihbaratına bere edi", — dep aytıla haberde.
Aynı zamanda aq qorçalayıcılar, Oksana Senedjuknıñ Rusiye FSB-sı tarafından taqip etilmesi 2022 senesi onıñ açıq Ukrayina tarafdarı mevamı ve Rusiye Federatsiyasınıñ Ukrayinağa qarşı tecavuzı aqqında menfiy lafları sebebinden başlandı, dep bildirdi. O vaqıttan berli onı bir qaç kere sorğuğa çağıra ediler, 2024 senesi avgustnıñ 14-nde FSB onıñ evinde tintüv keçirip, faalni tutıp aldı. O vaqıttan berli o Aqmescitniñ 1-nci SİZO-nda tutula.
58 yaşındaki Oksana Senedjuk tasil boyunca filolog, yarımada işğal etilgenine qadar Aqyar şeer devlet memuriyetinde çalıştı. 2014 senesine qadar yapqan işleri ve faal vatandaşlıq mevamı içün mukâfatlarğa saiptir. Yevromaydannı faal sürette destekley ve onda iştirak ete edi.
"KrımSOS" temsilcileri diger aq qorçalayıcı teşkilâtlarnen beraberlikte Oksana Senedjuknıñ siyasiy sebeplerden taqip etilmesini takbih etkenlerini ve onıñ azat etilmesini talap etkenlerini bildirdiler. Aq qorçalayıcılar Ukrayina akimiyetini Senedjuknıñ taqip etilmesine alâqası olğanlarğa qarşı sanktsiyalar kirsetmege ve halqara toplulıqnı Rusiyege qanunsız sürette apiske alınğanlarnı azat etmesi içün basqını quvetleştirmege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
