Advokat Edem Semedlâyev, uquqçı Lilâ Gemeci ve «Qırım birdemligi» cemaat birleşmesiniñ koordinatorı Dilâver Memetov oktâbrniñ 27-nde Rusiye uquq qoruyıcılarınıñ ziyaretinden soñ çıqarılıp yiberildi. Er birine ekstremizm ve terrorizm qanunlarına riayet etip bozmaycağını bildirdiler.
Bu aqta «Qırım birdemliginiñ» Facebook saifesinde haber etile.
«Üçüne de ekstremizm ve terrorizm saalarınıñ qanunlarını bozmaycağını qayd ettiler. Şimdilik olarğa protsessual status berilmedi. Prokuraturağa Ekstremizm ile küreş merkezinden malümat keldi, faaller bir kişilik narazılıqlar azırlay eken, şu sebepten üçü teşkilâtçı olaraq tenbiyelendi», – dep aytıla haberde.
Qırımdaki Rusiye uquq qoruyıcı hızmetleriniñ saytlarında şimdilik bir malümat yoq.
Oktâbrniñ 27-nde Aqmescitte «Qırım birdemliginiñ» toplaşuvında Rusiye prokuraturasınıñ hadimleri, kimligi belli olmağan maskalı insanlar ve politsiya hadimleri keldi.
Prokuratura vekilleri «Qırım birdemliginiñ» koordinatorlarından biri, Bağçasaraydaki «Hizb ut-Tahrir davasınıñ» mabüslerinden biriniñ oğlu Dilâver Memetov ve qırımlı uquqçı Lilâ Gemecige keldi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
