Uquq qoruyıcılar demokratik memleketlerniñ ükümetlerini, hususan "Qırım platforması"nıñ iştirakçilerini işğal etilgen Qırımda Lütfiye Zudiyeva ve diger cemaat faalleri, uquq qoruyıcılar ve jurnalistlerniñ siyasiy sebeplerden taqip etilmesine qarşı "qattı narazılıq bildirmege" çağırdılar.
Bir sıra uquq qorçalayıcı teşkilâttan kelgen bu talap ZMINA insan aqları merkeziniñ saytında derc etildi.
Uquq qoruyıcılar Lutfiye Zudiyevanıñ taqip etilmesine alâqası olğan şahıslarğa qarşı şahsiy sanktsiyalar qoyulmasını ve Ukrayina uquq qoruyıcı organlarınıñ mütenasip tahqiqat keçirmesini ve qabaatlılarnı mesüliyetke çekmesini talap etti.
Uquq qoruyıcılar dünyanıñ demokratik memleketlerini Qırım yarımadasında insan aqlarınıñ bozuluvı, hususan, cemaat faalleri, aq qorçalayıcılar ve jurnalistlerniñ taqip etilüvi boyunca muntazam monitoringni keçirmege ve olarğa tez cevap bermege çağırdılar.
Hatırlatamız, saba Canköyde uquq qoruyıcı ve "Qırım birdemligi" faaliniñ Lutfiye Zudiyevanıñ evinde tintüv keçirildi. Bundan soñ qadınnı Aqmescitteki "Ekstremizm ile küreş merkezi"ne alıp ketkenler.
Zudiyevanıñ evinde keçirilgen tintüv devamında telükesizlik hadimleri video nezaret registratorını, bütün telefonlarnı, flash-disklerni ve noutbuknı tutıp alğanlar. Berilgen malümatqa köre, tintüv yerine advokatlar Emil Kurbedinov ve Edem Semedlâyev kelgen. Evge kirmege tırışqankar, amma olarnı kirsetmegenler.
Oña qarşı eki memuriy protokol tizilgen. O, "kütleviy haber serbestligini qullanğan" eken. Birincisi, Zudiyevanıñ Facebook saifesinde ''Hizb ut-Tahrir'' diniy areketiniñ Rusiyede terroristik teşkilât olaraq tanılğanını qayd etmegeni, ekincisi ise, ''Azatlıq Radiosı''nı çetel agenti olaraq qayd etmegeni içün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
