''Rusiye propagandası, iç ve tış auditoriya içün, Rusiye Qırımda islâm terrorizmi ile küreşkenini bildirmekte. Lâkin böyle areketlerniñ terrorizm ile küreşnen iç bir alâqası yoq, olar Ukrayinanıñ işğal etilgen topraqlarındaki vatandaş ealisine qarşı terror usulı ola. Bu, Qırım Muhtar Cumhuriyeti, Aqyar, Donetsk, Lugansk, Herson ve Zaporijjâ vilâyetleriniñ sakinlerine nisbeten faşist rejiminiñ hırsızlav, işkence, apis cezaları ve diger vahşiy areketleriniñ daa da qattı sistematik ameliyatı ile tasdıqlana", - dep aytıla teşkilâtlarnıñ ortaq beyanatında.
Olar, başqa şeylernen beraber, çetel devletlerniñ ükümetleri ve halqara teşkilâtlarnı şularğa davet ettiler:
- Ukrayinanıñ bütün topraqlarınıñ işğalden azat etilmesi içün qoltutuvını arttırmaq;
- tintüv ve yaqalavlarğa alâqası olğanlarğa qarşı sanktsiyalar kirsetmek;
- Ukrayinağa Qırımda Rusiye Federatsiyasınıñ cinayetlerini tahqiq etmege yardım etmek;
- Rusiye Federatsiyasına basqını quvetleştirmek;
- Qırım siyasiy mabüsleriniñ azat etilmesini tezleştirmek içün halqara meydançıqlarnı çoqtan qullanmaq;
- 2014 senesinden başlap Qırımdaki Rusiye Federatsiyasınıñ areketleri neticesinde ketirilgen zararlarnı cedvelge kirsetmek maqsadınen Avropa Şurasınıñ Zararlar cedveliniñ vekâletini kenişletmege yardım etmek;
- Ukrayinağa qarşı tecavuz cinayeti içün Rusiye Federatsiyasınıñ reberligini mesüliyetke çeküv mehanizminiñ meydanğa ketirilmesine yardım etmek.
Beyanatnı QırımSOS, ZMINA insan aqları merkezi, ''Diya'' uquq qoruyıcı merkezi, Qırım uquq qoruyıcı gruppası, Vatandaş serbestligi merkezi, ''Qırım esnası'' cemaat teşkilâtları, ''Kremlniñ siyasiy mabüslerniñ tuvğanları birleşmesi'' ve İnsan aqları Ukrayina Helsinki birligi imzaladı.
Martnıñ 5-nde saba Qırımda qırımtatarlarnıñ evlerinde kütleviy tintüvler keçirildi. Bağçasarayda taqiqat tedbirleri "Qırım birdemliginiñ" faalleri, Canköy rayonında ise diniy erbaplar tarafından keçirildi. Umumen 10 qırımtatarınıñ evinde tintüvler keçirildi.
Neticede Rusiye kontrolindeki Aqmescitniñ Kiyev rayon mahkemesi qırımtatar faalleri ve vatandaş jurnalistleri Memet Lümanov, Aziz Azizov, Rustem Osmanov ve Mustafa Abduramanovnı 2024 senesi mayısnıñ 4-ne qadar 2-nci SİZOğa yolladı.
"QırımSOS" bildirgeni kibi, tintüvler dalğası işğalniñ 10 yılı içinde üçünci oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
