Rusiye quvetçileri bugün saba Qırımda yaqalanğan Ahayev qardaşlarınıñ bulunğan yerini bildirmey. İhtimal ki, olar iskencelerge oğratıla. Bunı Qırım.Aqiqatqa uquq qoruyıcı Lilâ Gemeci bildirdi.
"Tahqiqat arekteleri vaqtında qanunsız usullar qullanılğanını tüşünemiz, daa doğrusı yaqalanğanlar iskencelerge oğratıla. Çünki olarnıñ bulunğan yerini gizleyler, bundan ğayrı olarnıñ bulunuv yerini FSB-den tutıp alınğan gacetler yardımınen kendimiz ögrenip oldıq, em de advokatlarğa tahqiqat ve ondan evel keçirilgen tedbirlerde iştirak etmege izin bermeyler", - dedi o.
Gemeciniñ sözlerine köre, qırımtatar faalleri nevbetçi Qırım prokurorına ve Canköy ve Aqmescitteki arbiy tahqiqat bölüklerine muracaat etkenler.
"Amma insan aqları vekâletlisi, Canköy şeeriniñ nevbetçi prokurorı ile bağlanıp olamadıq. Bundan ğayrı biz Qırım ve Canköy şeeri boyunca Rusiye İİN muracaat ettik", - dedi o.
Dekabrniñ 19-nda işğal etilgen Qırımnıñ Canköy rayonındaki Avuz Qırq köyünde rusiye quvetçileri üç qırımtatarnıñ evinde tintüv keçirgen. Faallerniñ haber etkenine köre, tintüvnler ağa-qardaş Ernest, Marlen ve Amet Ahayevlerniñ evlerinde olıp keçken.
Cumaaqşamı künü, dekabrniñ 15-nde, Canköy rayonınıñ Avuz Qırq (Medvedevka) köyünde qırımtatarı Mustafa Murahasnıñ evinde tintüv keçirildi – Rusiye uquq qoruyıcıları «yasaqlanğan şeylerni» qıdırdı. Berilgen malümatqa köre, Rusiye İç işler nazirliginiñ hadimleri Avuz Qırqnıñ sakinine silâ ve narkotik qıdırmağa kelgen eken. Rusiye uquq qoruyıcıları ev saibinen bağlı haber kelgen, evinde «yasaqlanğan şeyler» ola bile eken, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
