İşğal etilgen Qırımda eñ az 20 qırımtatar qadanı Rusiyede taqip etilgen yaqınlarına destek olğanları içün olarnı mesüliyetke çekmege tırıştılar. Bunı "Qırım birdemligi" cemaat birleşmesi haber ete.
"Birinci idariy mesüliyetke celp etme 2018 avgust ayında olğan edi. O vaqıt birinci Aqmescit "Hizb ut-Tahrir davası"nıñ mabüsi Uzeir Abdullayevniñ apayı Abdullayeva Fera mahkeme icracılarına qarşılıq köstermekte ve mahkeme oturışı qapalı olğanı aqqında oña aytılğan soñ Qırım Yuqarı mahkemesiniñ birinci qatına yenmekten red etkeninde qabaatlanğan edi. Mahkeme icracılarınıñ versiyasına köre, Fera Abdullayeva qıçırğan ve isyan etken. Mudafaa tarafı ise aksine, mahkeme icracısı yüksek sesnen ve qaba davranğanında israr etken edi. Qırım mahkemesi Abdullayevanı aqlağan edi", - dep yazıla bildirmede.
"Qırım birdemligi"niñ qayd etkeni kibi, 2021 senesi oğlunıñ destegine piket keçirgeni içün Qurman rayon mahkemesi Arsen Abhairovnıñ anası Zelihanı qabaatlı tanıgan edi. Oña 10 biñ ruble cöreme tayin etilgen edi.
Şu sene mahkeme Asan Ahtemovnıñ anasına da para cezasını tayin etken edi. Qadın polis hadimlerine ve fevqulâde vaziyettte qaidelerge riayet etmemekte qabaatlı tanılğan edi.
Avgust ayında Ukrayina prezidentiniñ Qırım MC daimiy temsilciligi yarımadada qanusız şekilde 180 adam yaqalanğanı aqqında haber etken di, olardan 117-si qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
