''2023 senesiniñ soñunda Qırım uquq qoruyıcı gruppası Birleşken Milletler Teşkilâtınıñ Mustaqil halqara komissiyasına rusiyeliler tarafından cenüpteki yañı işğal etilgen topraqlarda hırsızlanğan ve Aqmescitniñ üç SİZO-sına çıqarılğan 53 vatandaş aqqında malümat berdi'', – dep bildirdi Skripnik Facebookta.
Onıñ qayd etkenine köre, aqiqatta böyle insanlar daa çoq, amma şimdilik tek 53-ü aqqında malümat toplanıldı.
QUQG idaresiniñ yolbaşçısı, Ukrayinada bozuvlarnı tahqiq etüv boyunca BM Mustaqil halqara komissiyasınıñ işi bir yılğa uzatılğanını bildirdi.
Qırımtatar resurs merkezi bildirgenine köre, bugünki künde azatlıqtan marum etilgen 194 qırımlı siyasiy mabüs qayd etildi, olardan 134 qırımtatardır.
Ukrayina Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-na qadar Rusiyede 208 qırımlı siyasiy mabüs tutula, olardan 125 - qırımtatardır.
Daa evel Olğa Skrıpnık, eñ azından 200 Ukrayina vatandaşı Qırımda uydurılğan siyasiy davalar boyunca apiste yatqanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
