Martnıñ 23-nde Bağçasarayda tintüv keçirgen Rusiye quvetçileri Qırımtatar Qurultayınıñ delagatı Mustafa Mustafayevden ğayrı onıñ qardaşınıñ oğlunı Şevket Ergaşevnı da yaqalağanlar. Bunı uquq qoruyıcı Lutfiye Zudiyeva "Qırım birdemligi" cemaat birleşmesine bildirdi.
Onıñ bildirgenine köre, erkekler al-azırda FSB binasında tutulalar.
"Mustafayevden ğayrı onen beraber FSB binasında tutulğan qardaşınıñ oğlu Şevket Ergaşev da yaqalandı. Mustafayevniñ oğulları Amet ve Sabri Mustafayevni yaqalamadılar, olar öz isteginen babasınen beraber kettiler, amma içeri olarnı yibermediler, olar tışarıda bekleyler", - dep qayd etti Zudiyeva.
Lutfiye Zudiyevanıñ sözlerine köre, FSB demiryolda "diversiya" davasında "icracılarnı" acele olaraq tampağa vazife alğan.
"Daa bir müim şey, tintüvler raatlıq künleri bile keçirile. Bu, vazife acele olğanını, nezaret etilgenini köstere. Vazife mümkün qadar tez bu diversiyanıñ "icracılarını" tapmaqtır. Menimce, bugünki tintüv de soñki degil", - dedi o.
Martnıñ 23-nde Qurultay delegatı Mustafa Mustafayevniñ evine Rusiye quvetçileri tintüvnen keldi. Tintüv bitken soñ onı oğlu ile beraber bellisiz yerge alıp kettiler.
Daa evel Rusiye FSBsi Qırımtatar Milliy Qurultayınıñ delegatı Lemmar Yunusovnıñ evini tintken edi. Bundan evel qırımtatar Edem Murtazayev ve Memet Aşurovnıñ evlerinde de tintüv keçirilgen edi.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
