Ukraina uquq qoruyıcısı, publitsist Mıroslav Marınovıç Qırımtatar Milliy Meclisiniñ Yañı yılnen hayırladı. Milliy Meclis reisi Refat Çubarov Marinoviçniñ qırımtatarlarğa aytılğan sözlerini derc etti.
"Ürmetli qırımtatarlar! Sizni Yañı yılnen hayırlamağa isteyim, amma birinciden keçikkenimni bağışlañız. Dostlarımnıñ çoqusını hayırlap, sizni kenarda qaldırdım, çünki hayırlavlarımnı Milât bayramına qoştım. Soñ de o, de bu... Amma yañı yıl hayırlavımnıñ esası mından çıqacaq: bu yıl qabaatsız mabüslerge azatlıqnı bergende, adaletsiz unutılğanlarğa tanuv bergende, tuvğan toprağında aqsız marum etilgenlerge topraqnı qaytarğanda, Tañrı sizni kenarda qaldırmasın", - denile beyanatta.
Daa evel Milliy Meclis reisi Refat Çubarov dostlarını ve vatandaşlarını kelecek Yañı 2020 yılınen hayırladı. O, "Kelecek yılda Bağçasarayda" teklifini kimse lâğu etmey, dep qoştı.
