Soñki afta içinde Rusiyeniñ Ukrayınanıñ bir qaç şeerine qarşı yapqan ücümleri neticesinde eki bala elâk oldı ve eñ az 15 bala yaralandı, dep bildirdi UNICEF vekili Munir Mamedzade.
Onıñ hatırlatkanına köre, soñki altı kün içinde Dnipro, Lviv, Harkiv, Kyiv, Odesa ve diger mesken yerlerde ücümlerniñ qurbanları bala ve qorantalar, infrastruktura obyektleri oldı – soñki malümatqa köre, eñ az sekiz mektep ve 10 tibbiy müessise, şu cümleden loqsahane zarar körgenler.
«Balalarnıñ öldürilüvi ve yaralanması, mektep ve hastahanelerge qarşı ücümler balalarnıñ aqlarını ciddiy seviyede boza, olar toqtatılmalı. Cenk qanunlarına riayet etilmeli. Balalar ve vatandaş infrastrukturası qorçalanmalı», – dep aytıla teşkilât vekiliniñ beyanatında.
Mamedzade, BM esabatlarına köre, tahminen 1800 bala Ukrayınada cenk kerginleşken soñ öldürildi ya da yaralandı, dep qoştı.
Baş prokurorınıñ ofisi bildirgenine köre, yanvarniñ 2-ne qadar Rusiyeniñ silâlı istilâsı neticesinde Ukrayınada 515 bala elâk oldı, eñ az 1179 bala çeşit seviyede yaralandı.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayına şeerlerine muntazam sürette ateş aça. Delil ve şaatlıqlarğa baqmadan, Moskva Ukrayınada vatandaşlarğa qarşı ücüm yapqanını inkâr ete. Soñki bir qaç kün devamında Ukrayına Rusiyeniñ bir qaç ücümine oğradı. Neticede bu darbelerden yüzlernen kişi yaralandı, onlarnen elâk oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
