UNESCO kâtibiyeti 2019 senesi aprel ayına qadar Rusiye işğal etken Qırımdaki vaziyetniñ doğru monitoringiniñ birinci fazasını kerçekleştirmege planlaştıra, dep bildire Ukraina Tış işler nazirliginiñ matbuat hızmeti.
Haber etilgeni kibi, UNESCO «Ukraina tarafı ile keçirilgen bir qaç mesleatnıñ neticeleri esasında belgilengen UNESCO mesüliyeti saalarında» vaziyetniñ monitoringini keçirmege istey.
Ukraina Tış işler nazirligi bildirdi ki, UNESCO reberligi Qırımdaki doğru monitoring meselesinde «Ukraina ile işbirligine» yüksek qıymet kesti.
UNESCO baş müdiri Odri Azuleniñ soñki maruzasında Rusiye işğal etken Qırımda vaziyet kerginleşkeni aqqında aytılğan edi.
2017 senesi oktâbr ayında Ukraina Tış işler nazirligi bildirdi ki, UNESCO vekilleri yarımada işğalinden sebep vaqtınca toqtatılğan Qırımnıñ doğru monitoringini devam ettirmege qarar aldı.
Qırımnıñ Rusiye medeniyet naziri Arina Novoselskaya UNESCO temsilcilerini yarımadağa davet etip, medeniy ve tarihiy miras yerleriniñ vaziyetine «obyektiv qıymet kesmege» teklif etken edi.
Ukraina medeniyet nazirligi bildire ki, Bağçasaray qoruğında Qırımnıñ rus akimiyeti keçirgen işler sebebinden Han sarayınıñ baş binası telüke astında qala.
UNESCO dünya mirasınıñ cedveline işğal etilgen Qırımdaki «Hersones Tavriçeskiy» kire. Cedvelge kirecek namzetler arasında Bağçasaraydaki Han sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermek ve Çufut Qale bar.
