Ukrayına Mudafaa naziri Rustem Umerov ve Ukrayına Silâlı quvetleriniñ baş komandanı Oleksandr Sırskıy Pentagon yolbaşçısı Lloyd Austinnen telefonda laf ettiler.
Umerovnıñ aytqanına köre, subet vaqtında «cebedeki vaziyet muzakere etildi». Bundan ğayrı, «vaziyetni añlav ve areket planı aqqında aytıldı».
«Mudafaa nazirine şimdiki vaziyet ve Rusiyeniñ Ukrayına şeerleri ve vatandaş infrastrukturasına yapqan ücümleri aqqında tafsilâtlı malümat berdik. Men daa bir kere qayd ettim: Ukrayına daa çoq ava mudafaa sistemalarına ve raketalarğa muhtac», – dep yazdı Umerov.
ABD senatı fevralniñ 13-nde gece toplaşuvında Ukrayına, İsrail ve Tayvanğa 95 milliardlıq yardım belgilegen qanun leyhasına qoltuttı, 60 milliard Kyivge berilecek. Lâkin ekseriyeti cumhuriyetçiler olğan Vekiller palatası bu qanun leyhasını alâ daa baqmadı. Cumhuriyetçilerniñ büyük qısmı sabıq prezident Donald Trumpqa baqa, o ise bu qanun leyhasını tenqit ete.
Fevral ayında Vekiller palatası spikeri Michael Johnson Senat qoltutqan qanun leyhasını red etti, amma «yañı teklifke» rey berile bile, dep ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
