Ukrayina, Ukrayina topraqlarından Rusiye ordusınıñ çıqarılması mehanizmini işlep çıqarmaq içün Halqara iş gruppasınıñ meydanğa ketirilmesini teklif etti, dep aytıla Ukrayina mudafaa naziri Rustem Umerovnıñ yanvarniñ 14-nde Davostaki forum vaqtında bergen beyanatında.
''Ordularnı çıqarmaq mehanizmini beraberlikte işlep çıqarmaq içün mudafaa nazirleri ve milliy havfsızlıq mesleatçıları seviyesinde Halqara iş gruppasını meydanğa ketirmekni teklif ettim'', - dedi nazir.
Umerovnıñ aytqanına köre, Ukrayina prezidenti Volodımır Zelenskıy tarafından teklif etilgen ukrayin barışıq formulası dünyanıñ 83 memleketini birleştire.
"Rusiye ordusı ve terroristik teşkilâtlarnıñ vaqtınca işğal etilgen topraqlardan tam çıqarılmaması ve silâsızlandırılması olmadan Ukrayinanıñ suvereniteti ve topraq bütünliginiñ ğayrıdan tiklenüvi aqqında laf etmekniñ manası yoq", - dep qayd etti o.
Daa evel, yanvarniñ 14-nde, İsviçreniñ Davos şeerinde Ukrayina prezidenti Ofisiniñ yolbaşçısı Andriy Yermaknıñ iştiragi ile milliy telükesizlik mesleatçıları ve siyasiy mesleatçılarnıñ dörtünci körüşüvi olıp keçti.
Tedbirde 81 memleket ve halqara teşkilâtlarnıñ vekilleri iştirak etti. Körüşüvniñ kün tertibinde ''Ukrayina barışıq formulasınıñ 5 maddesini baqmaq, şu cümleden: Rusiye ordulasınıñ çıqarılması, adaletniñ tiklenmesi, ekologik telükesizlik, cenkniñ tekrarlanmasına yol bermemek ve cenkniñ bitmesini tasdıqlamaq''.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
