Ukrayina mudafaa naziri Rustem Ümerov, yanvarniñ 9-nda içtimaiy ağlarda yazğanına köre, "Ramştayn" formatında Ukrayina mudafaası boyunca Kontakt gruppasınıñ toplaşuvında işini başladı.
"ABD Mudafaa naziri Lloyd Ostin ile müim körüşüv keçirdim, körüşüvde azırlıq ve işbirlikniñ esas yönelişlerini muzakere ettik", — dep bildirdi nazir.
Ümerov şunı da bildirdi ki, bugün mudafaa koalitsiyalarınıñ liderleri işbirlikniñ sekiz yönelişiniñ er biri boyunca "yol haritalarını" tasdıqlaycaq. Olar strategik maqsatlarnı ve eñ azından 2027 senesiniñ soñuna qadar arbiy yardımnıñ esas ihtiyaclarını qayd etmeli.
"Bu vesiqalar Ukrayina ve ortaqlar tarafından işlep çıqarılıp, destek ve yardımnıñ ava mudafaası, artilleriya, zırhlı tehnika, dronlar, ava quvetleri, deñiz havfsızlığı ve diger müim saalar boyunca ayırılması içün temel teşkil etecek. İleride çoq işimiz bar", — dep qoştı o.
Lloyd Ostin de körüşüv aqqında qısqaca haber etip, ukrayin zenaatdaşı Rustem Ümerovnen körüşkenine sevingenini yazdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
