İşğal etilgen Qırımğa suv satuv imkânı meselesi siyasiy seviyede muzakere etilmeli, çünki bu Ukrainanıñ milliy telükesizlik meselesi ola, dep tüşüne Ukraina Yuqarı Radasınıñ deputatı Rustem Umerov. Bu fikrini o, Qırım.Aqiqatqa bildirdi.
«Bu siyasiy qarar olmalı. Bazı deputatlar fikirlerini bildireler, men olarnı izaatlap olamayım. Olardan soramaq kerek. Mence, şimdi Qırımğa suv bermege mümkün degil, çünki bu vaqtınca işğal etilgen topraq ola. Ve bu mesele siyasiy seviyede al etilecek milliy telükesizlik meselesidir», – dep qayd etti Umerov.
Halq deputatınıñ qayd etkenine köre, işğal etilgen Qırımğa suv satuv qanun leyhası qayd etilse edi, o, qarşı çıqar edi.
Daa evel Ukraina Yuqarı Radasınıñ bücet komitetiniñ yolbaşçısı Yuriy Aristov Rusiye işğal etilgen Qırımğa suv satmaq ğayesi aqqında Azatlıq Radiosınıñ leyhası olğan «Shemı» mühbirine (video 2019 senesi oktâbrniñ 17-nde çıqarıldı – QA) izaat berip ayttı.
Qırımtatar Milliy Meclisiniñ reisi Refat Çubarov bücet komiteti yolbaşçısınıñ ğayesini izaatlap, Rusiye prezidenti Vladimir Putin Dnipro suvını esas Ukrainadan işğal altındaki Qırımğa satuv meselesini «sert bir şekilde kötere bile», dep qayd etti.
Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, yarımada işğalden qurtarılğanına qadar Şimaliy-Qırım kanalından Qırımnıñ suv teminlevi imkânsız ola, dep işandıra.
Rusiye Devlet Dumasınıñ Qırım deputatı Mihail Şeremet, Rusiye tarafı Dnipro suvınıñ esas Ukrainadan işğal etilgen Qırımğa satuv ğayesine «tek qoltutacaq», dep ayttı.
Bu afta Rusiye kontrolindeki Qırım ükümetiniñ yolbaşçısı Yuriy Gotsanükniñ bildirgenine köre, «Voda Krıma» müessisesinde toplaşuv ötkerildi, anda qırımlılarnı içme suvınen teminlev ve suv teminlev hatlarında onı coymamaq içün qullanılacaq usulları muzakere etildi.
Ukraina akimiyeti işğal etilgen Qırımnıñ suvnen teminlevi tek yarımada işğalden qurtarılğan soñ yañıdan başlatılacaq, dep çoq bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
