Link açıqlığı

Saatnıñ esas haberi

Umerovğa üküm çıqarğan qırımlı qadığa qabaatlayıcı akt yollanıldı – Qırım Muhtar Cumhuriyetiniñ prokuraturası


İlmi Umerov
İlmi Umerov

Qırım Muhtar Cumhuriyeti Prokuraturasınıñ protsessual reberligi altında mahkemege 2017 senesi Qırımtatar Milliy Meclisiniñ reis muavinine üküm çıqarğan Rusiye kontrolindeki Qırımnıñ Aqmescit rayon mahkemesiniñ qadısına qarşı qabaatlayıcı akt yollanıldı, dep bildire müessiseniñ matbuat hızmeti.

«Yarımadada işğal başlağanından berli halqara gumanitar uquq normalarına köre yalıñız Ukraina milliy qanunları qullanılmaq kerek olğanını bilip, «qadı» Qırımtatar Milliy Meclisiniñ reis muavinine qarşı «ATR» ukrain telekanalınıñ canlı yayınında çıqışta bulunıp, Rusiye topraq bütünligini bozmağa çağıruv «qabaatlayıcı aktını» qanunsız bir şekilde baqtı. «Dava» baqılğanda qadı Rusiye ceza ve ceza-protsessual qanunlarını qanunsız bir şekilde qullandı. Aydınlatılğan qabaatlavnı red etken bir sıra delilni, hususan «işbu yayın Rusiye topraq bütünliginiñ bozulmasına yardım etip olamağanını» qayd etken ekspert ve mütehassısnıñ qararını körmemezlikke urdı», – dep aytıla haberde.

Qırım Muhtar Cumhuriyetiniñ haberinde qabaatlanğannıñ adı ve soyadı aytılmay. Açıq menbalarda olğan malümatqa köre, laf Qırımtatar Milliy Meclisiniñ reis muavini İlmi Umerovğa üküm çıqarğan Andrey Kulişov aqqında kete. Qırım Muhtar Cumhuriyetiniñ Prokuraturasındaki haberdar menba Qırım.Aqiqatqa bu malümatnı tasdıqladı.

Külişovnıñ qabaatı isbatlansa, o, Ukraina Ceza kodeksiniñ 438-inci maddesiniñ 1-inci qısmına istinaden 12 yılğa apiske alına bile.

Qırım Muhtar Cumhuriyetiniñ Prokuraturası Rusiye işğal etken Qırımda Qırımtatar Milliy Meclisiniñ reis muavini İlmi Umerovnı üküm etken qadığa şübheli olğanını bildirgen edi.

2016 senesi FSB tahqiqatçıları ekstremizm maddesi boyunca İlmi Umerovğa qarşı cinaiy dava açtı. Tutuv, tintüv ve cinaiy davanıñ açılması, Meclis reisiniñ muavini, qırımtatar milliy areketiniñ meşur iştirakçisi İlmi Umerovnıñ mecburiy mahkeme-psihiatrik ekspertizasını keçirmek içün psihiatrik hastahanesinde tutuv küçlü bir cemaat ve halqara rezonansına sebep oldı.

Kreml kontrolindeki Aqmescit rayon mahkemesi 2017 senesi sentâbrniñ 27-nde Umerovnı eki yıl yaşav tarzı koloniyasında qalmasına üküm etti. Oña eki yıl açıq faaliyetnen oğraşmağa ve kütleviy haber vastalarında çıqışta bulunmağa yasaq ettiler. Umerov, oña qarşı açılğan cinaiy davanı siyasiy sebepli dep adlandırdı.

2017 senesi oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Umerovnı azat etip, olarnı Türkiyege teslim etkenler, daa soñra Umerov ve Çiygoz Kyivge kelgenler.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG