Ukraina Mudafaa naziri Rustem Umerov Pentagon yolbaşçısı Lloyd Austinnen telefon vastasınen laf etti.
Nazirniñ aytqanına köre, subet vaqtında o, cebedeki vaziyet aqqında soñki malümatnı paylaştı: arbiy areketlerniñ dinamikası, Ukrayina ordusınıñ sınavları ve ihtiyacları.
«Havfsızlıq saasında ilerideki yardımnı muzakere ettik. ABD bizni Silâlı Quvetlerimizge duşmandan bir adım ögde olmağa imkân bergen müim resurslarnen teminley», – dep qayd etti Umerov, onıñ aytqanlarını Ukrayina Mudafaa Nazirliginiñ matbuat hızmeti bildire.
Haber etile ki, subetdeşler nevbetteki adımlarnı da belgilediler – hususan, yanvarniñ başında olacaq Ramştayn formatındaki Bağ gruppasınıñ toplaşuvını.
Pentagon bildirgenine köre, Umerov ve Austin Ukrayina mudafaa bağ gruppasınıñ nevbetteki körüşüviniñ planlaştırıluvını da muzakere ettiler.
Ukrayina Silâlı Quvetleriniñ Baş Komandanı Oleksandr Sırskıynıñ aytqanına köre, dekabrniñ 17-ne qadar Mudafaa Quvetleri umumiy uzunlığı 1170 kilometrden ziyade olğan cebede faal arbiy areketler keçire, eñ zor vaziyet şimdi Pokrovsk ve Kurahov yönelişlerinde qala. O, Kursk vilâyetinde Rusiye küçleri tarafından «intensiv ücüm areketleri» aqqında, şu cümleden Şimaliy Koreya ordusınıñ bölükleri qullanılğanını ayttı.
Noyabr ayında Reuters agentligi Ukrayinanıñ Baş ştabında çalışqan yüksek rutbeli ukrayin arbiy menbasına esaslanıp, Ukrayina avgust ayındaki cenk areketleri vaqtında zapt etken Rusiye Federatsiyasınıñ Kursk vilâyetindeki topraqlarınıñ 40%-ından ziyadesini Rusiyeniñ qarşı ücümleri sebebinden coyğanını bildirdi. Rusiye Kursk vilâyetinde 59 biñge yaqın askerni yerleştirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
