«Mudafaa nazirliginiñ iç teftişi ve Mudafaa nazirliginiñ yañı Baş inspektsiyası bütünley çalışıp başladı. Endi çoq bozuv qayd etkenler – soñki 4 ayda daa evel yapılğan 10 milliardlıq bozuvlar. Episine sert bir cevap beremiz. Nizam ve mahsus hızmetlernen sıqı işbirligi yapamız», – dep yazdı Umerov Facebookta.
Onıñ hatırlatqanına köre, dekabr ayında Ukrayına Telükesizlik hızmeti Ukrayına Mudafaa nazirliginen beraber aman-aman 1,5 milliard grivnalıq silâ satın aluvnen bağlı qabarcılıq shemasını yoq etti.
Nazirniñ qayd etkenine köre, Ukrayına Mudafaa nazirligi taqımınıñ prioritetlerinden biri «sistemanı uyğun olmağan iştirakçilerinden temizlemek ola – em müessise içinde, em tışında».
«Bunıñ üzerinde faal çalışamız – uquq qoruyıcı organlarınen sıqı işbirligi yapıp, qabarcılıqnı yoq etemiz. Sistema tirene, lâkin yeñecekmiz», – dedi o.
Bıltır mart ayında «Shemı» jurnalistleri (Azatlıq Radiosınıñ leyhası) 2022 senesi dekabr ayında Ukrayına Mudafaa nazirligi ve şahsiy şirketler arasında tizilgen ordu aşınen bağlı sekiz añlaşmanı elde etip, Ukrayına Silâlı Quvetleri içün yüksek mal fiyatınen bağlı qavğadan soñ yañıdan tizilgen añlaşma ilâveleriniñ fiyatlarınen qıyasladı.
Jurnalistlerniñ hulâsasına köre, teslimatçılarnıñ ekseriyeti ordu içün mal fiyatlarını eksiltip, añlaşma müddetlerini üç ay yapsa da, bir çoq mal fiyatı alâ daa yüksek qala.
Aynı vaqıtta «Shemı» bu şirketlerniñ maliye-hocalıq esabatlarını talil etip, ordu içün eñ çoq ihtiyacları olğan mallarnı (qartop, armut, yımırta, qapısta ve ilâhre) ordu içün satacaq fiyattan eki-üç qat ucuz alalar, dep hulâsa çıqardı. Böylece, çoq milliardlı añlaşmalarda kâr 30 fayızdan 70 fayızğa qadar ola bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
