Ukrayina mudafaa naziri Rustem Ümerov Kıyivde Felemenk mudafaa naziri Ruben Brekelmans ile körüşti. Muzakerelerniñ merkezinde — mudafaa işbirliginiñ pekitilmesi ve Ukrayinağa qoltutuv, dep yazdı Ümerov saban ayınıñ 31-nde.
"Felemenk Ukrayinanı siyasiy, diplomatik ve arbiy seviyelerde desteklegen strategik ortaq", — dep qayd etti ukrayin naziri ve bu sene Ukrayinağa qoşma 3,5 milliard yevro ayırmaq qararı içün teşekkür bildirdi.
Taraflar ava ve deñiz mudafaasınıñ quvetleştirilmesini muzakere ettiler. Mudafaa-sanayı kompleksindeki işbirligine ayrı diqqat ayırıldı, dep qayd etti Ümerov.
"Felemenk, "Dron hattı" leyhasına qol tuta ve ukrayin istisalına yatırım yapa. Felemenk şirketlerini MSK-ne ortaq leyhalarğa davet etemiz. Aynı zamanda, Ukrayina Felemenkte ortaq teşebbüslerine yatırım yapmağa azır", — dep aytıla haberde.
Körüşüvniñ neticesinde mudafaa satın aluvlarında işbirlikniñ semereliligini arttırmaq niyetleri aqqında Mektüp imzalanğan.
Saban ayınıñ başında Felemenk baş naziri 2026 senesi Ukrayina içün 3,5 mlrd yevro devlet destegi olacağını ilân etti.
Felemenk Rusiye istilâsına qarşı küreşini devam etken Ukrayinağa qol tuta. Başqa şeylernen beraber Amsterdamğa silâ, F-16 uçaqları ve zeniat sistemaları ile arbiy yardım köstere, em de ukrayin arbiylerini ögrete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
